நான் விரும்பும் கவிஞர் – பாரதியார்

முன்னுரை:

     தமிழ் இலக்கிய உலகில் தனி முத்திரை பதித்தவர், பாரதியார். ‘செந்தமிழ்த் தேனி’, ‘சிந்துக்குத் தந்தை’ என்று பாரதிதாசனால் பாராட்டப்பெற்ற பாரதியே நான் விரும்பும் கவிஞர் ஆவார்.

தோற்றம்:

     பாரதியார், தூத்துக்குடி மாவட்டத்தில் உள்ள எட்டையபுரத்தில் 1882ஆம் ஆண்டு திசம்பர் திங்கள் 11ஆம் நாள் பிறந்தார். இவருடைய பெற்றோர் சின்னச்சாமி – இலக்குமி அம்மையார் ஆவர்.

தமிழ்ப் பற்று:

     பாரதியார், வடமொழி, ஆங்கிலம், இந்தி, வங்காளம் முதலிய மொழிகளில் புலமை பெற்றவர். அதனால்,

     “யாமறிந்த மொழிகளிலே தமிழ்மொழி போல்

     இனிதாவது எங்கும் காணோம்”

என்று தமிழ் மொழியின் சிறப்பைப் பாடியுள்ளார்.

     “சொல்லில் உயர்வு தமிழ்ச் சொல்லே – அதைத்

     தொழுது படித்திடடி பாப்பா”

 என்று தமிழ் மொழியின் உயர்வைப் பாடுகிறார், பாரதியார்.

விடுதலை வேட்கை:

     பாரதியார், அனல் கக்கும் பாடல் அடிகளால் தமிழ் மக்களிடையே விடுதலை உணர்வை ஊட்டினார்.

     “ஆடுவோமே - பள்ளுப் பாடுவோமே!

     ஆனந்த சுதந்திரம் அடைந்துவிட் டோமென்று”

 என்று இந்திய விடுதலைக்கு முன்பே பாடிக் களித்தார்.

     “ஆயிரம் உண்டிங்கு சாதி – எனில்,

     அன்னியர் வந்து புகல் என்ன நீதி?”

 என்று பாரதியார், ஆங்கில ஆட்சியின் அடக்குமுறையை எதிர்த்துக் குரல் எழுப்பினார்.

முடிவுரை:

     தமிழ் இலக்கிய வானில் ஒளி வீசித் திகழ்ந்தவர்    ‘தேசியக் கவி’ பாரதியார். அவர், தம் சுவைமிக்க கவிதைகளால், தாய் நாட்டின் விடுதலைக்கும் சமூக நீதிக்கும் பெண்ணுரிமைக்கும் முழக்கமிட்டார். அதனால், நான் விரும்பும் கவிஞராக பாரதியார் திகழ்கிறார். பாரதியின் கனவுகளை நனவாக்குவோம்!.